ഗോപാൽസ്വാമി ഹിൽസ്- ബന്ദീപൂർ കടുവാ സങ്കേതത്തിനരികിലെ പൂക്കളുടെ താഴ്വര | Gopalaswamy Hills | Bandipur

 

ഗുണ്ടൽപേട്ട എന്ന് കേൾക്കാത്ത മലയാളികൾ ഉണ്ടാവില്ല, കാര്യം മറ്റൊന്നുമല്ല നാം നിത്യജീവിതത്തിൽ ഉപയോഗിക്കുന്ന പച്ചക്കറികളിൽ അധികവും കർണാടകത്തിലെ ചാമരാജനഗർ ജില്ലയിലെ ഗുണ്ടൽപേട്ട എന്ന ഗ്രാമത്തിൽ നിന്നുള്ളവയാണ്.

വയനാട്ടിലെ മുത്തങ്ങ ബോർഡറും കടന്ന് ഏകദേശം 30 കിലോമീറ്റർ ബന്ദീപൂർ കടുവാ സങ്കേതത്തിലൂടെ സഞ്ചരിച്ചാൽ ഗുണ്ടൽപേട്ടയിലെത്താം. തക്കാളിയും, ഉള്ളിയും, കേബേജും, പയറും, ബീറ്റ്റൂട്ടും, പച്ചമുളകും തുടങ്ങിയ പച്ചക്കറികൾ കിലോമീറ്ററുകളോളം വിളവെടുപ്പിനായി തയ്യാറായി നിൽക്കുന്നത് കാണാം. കേരളക്കാർ പച്ചക്കറി കഴിക്കണമെങ്കിൽ ഗുണ്ടൽപേട്ടക്കാർ പാടത്തിറങ്ങണമെന്ന് സാരം.

പച്ചക്കറി പോലെ തന്നെ അവരുടെ മറ്റൊരു പ്രധാന കൃഷിയാണ് പൂക്കൾ. നമുക്ക് ഒാണക്കാലമാവുന്നതിന് അടുപ്പിച്ച് പച്ചക്കറി തോട്ടങ്ങളിൽ അവർ ചെണ്ടുമല്ലിയുടെയും സൂര്യകാന്തിയുടെയും വിത്തിറക്കും. മൂന്ന് മാസം കൊണ്ട് കിലോമീറ്ററുകളോളം പൂക്കളുടെ താഴ്വരയാവുന്ന ഇന്ത്യയിലെ അപൂർവം ചില കാഴ്ചകളിൽ ഗുണ്ടൽപേട്ട് ഗോപാൽസ്വാമി ഹിൽസ് പ്രദേശങ്ങൾ ഇടം പിടിക്കും. ഗുണ്ടൽപേട്ടയ്ക്ക് പൂക്കളുടെ നിറകുടമെന്നും കടുകവകളുടെ നാടെന്നും വിളിപ്പേരുണ്ട്.

ഇന്ത്യയിലെ തന്നെ ഏറ്റവും വലിയ രണ്ടാമത്തെ കടുവാ സങ്കേതമായ ബന്ദീപൂർ റിസർവ്ട് ഫോറസ്റ്റിനോട് ചേർന്ന് നിൽക്കുന്ന നിരവധി ഗ്രാമ പ്രദേശങ്ങൾ ഉണ്ട് ഗുണ്ടൽപേട്ടയിൽ. വന്യമൃഗങ്ങളുടെ ശല്യം അതിരൂക്ഷമാണ് ഈ പ്രദേശങ്ങൾ. കാടിറങ്ങി വരുന്ന വന്യമൃഗങ്ങൾക്കിടയിൽ എങ്ങനെയാണ് നിർഭയരായി ഗ്രാമത്തിലുള്ളവർ ജീവിക്കുന്നതെന്ന് ഈ പ്രദേശങ്ങളിലൂടെ യാത്ര ചെയ്യുമ്പോൾ ചിന്തിച്ച് പോവും.

gopalswami hills | gundelupet | bandipur tiger reserved forest | karnataka | rk nadapuram | rayees koodatt

പുഴയും വെള്ളച്ചാട്ടവും കൊടും കാടും, മഴ നനഞ്ഞ് പശുക്കടവെന്ന മലയോര ഗ്രാമത്തിലേക്ക് ഒരു യാത്ര പോവാം | Pashukkadav Kuttiady

മൂന്ന് ഭാഗവും മലകളാൽ ചുറ്റപ്പെട്ട്, വന്യജീവികൾ സ്വൈരവിഹാരം നടത്തുന്ന കൊടും കാടും പുഴകളും വെള്ളച്ചാട്ടവുമൊക്കെയുള്ള കോഴിക്കോടിന്റെ വടക്ക് കിഴക്കായി പുഴകളുടെ തലോടലിൽ പച്ചപുതയ്ച്ച് കിടക്കുന്ന ഒരു ഉൾനാടൻ മലയോര ഗ്രാമമാണ് പശുക്കടവ്. 

ഇവിടെ നിന്ന് മലകൾ കയറി ചെല്ലുന്നത് മലവയൽ നാടായ വയനാട്ടിലേക്കാണ്. മഴക്കാല യാത്രയ്ക്ക് അനുയോജ്യമായ സ്ഥലമാണിവിടം, മഴ തുടങ്ങിയാൽ തോരാൻ സമയമെടുക്കുന്ന സ്ഥലങ്ങളിൽ മുൻപന്തിയിൽ നിൽക്കുന്നു പശുക്കടവ്.  പുഴയിൽ കുളിച്ചുകൊണ്ടിരിക്കെ അപ്രതീക്ഷിതമായി വന്ന മലവെള്ളത്തിൽപ്പെട്ട് 6 പേർ മരിക്കാനിടയായ സംഭവത്തോടെയാണ് പശുക്കടവ് എന്ന ചെറിയൊരു മലയോര ഗ്രാമത്തെ കേരളമറിഞ്ഞത്. കുറ്റ്യാടിയിൽ നിന്ന് വടക്ക് ഭാഗത്തേക്ക് 20 കിലോ മീറ്റർ സഞ്ചരിച്ചാൽ വയനാടിന്റെ മലഞ്ചെരുവിൽ സ്ഥിതിചെയ്യുന്ന പശുക്കടവിലെത്താം.

പ്രധാനപ്പെട്ട രണ്ട് പുഴകളുടെ ഉൽഭവ കേന്ദ്രമാണിവിടം. അതിലൊന്നാണീ ചതിയൻ പുഴ എന്നറിയപ്പെടുന്ന കടന്തറ പുഴ. വയനാടൻ കാടുകളിൽ മഴ പെയ്യുമ്പോൾ പുഴയിലെ വെള്ളം പെട്ടെന്ന് കൂടുകയും കാര്യങ്ങൾ നിയന്ത്രണാധീതമാവുകയും ചെയ്യും. അത് കാരണമാണീ പുഴയ്ക്ക് ചതിയൻ പുഴ എന്ന് പേര് ലഭിച്ചത്. പൂഴിത്തോട് പവർ ഹൗസ് സ്ഥിതി ചെയ്യുന്നതും ഇവിടെയാണ്. പശുക്കടവിൽ നിന്ന് ഏകദേശം 4കിലോമീറ്റർ സഞ്ചരിച്ചാൽ ഇവിടെയെത്താം.  

പശുക്കടവ് കുരുടന്‍ കടവ് പാലം

കുരുടൻകടവ് പുഴയാണ് പശുക്കടവിൽ നിന്ന് ഉൽഭവിക്കുന്ന മറ്റൊരു പുഴ. പുഴയുടെ ഇടത് വശത്തുള്ള കാട്ടിലൂടെ സഞ്ചരിച്ചാൽ വയനാട്ടിലെ നിരവിൽപുഴ എന്ന പ്രദേശത്ത് എത്താം. കുരുടൻ കടവ് പലം കടന്ന് ഏകദേശം 5 കിലോമീറ്റർ കുത്തനെ മലകയറിയാൽ നല്ല ഒരു വ്യൂ പോയിന്റും ഉണ്ട്. സഞ്ചാരികളെ ആകർശിക്കാനുള്ള പ്രകൃതി ഭംഗി ഉണ്ടായിട്ടും പശുക്കടവിലേക്ക് വളരെ ചുരുക്കം പേർ മാത്രമാണ് എത്തിച്ചേരുന്നത്.

പ്രസിദ്ധമായ വട്ടിപ്പനമല കോറി സ്ഥിതിചെയ്യുന്നത് പശുക്കടവിലാണ്. നാട്ടുകാരുടെ നിരന്തരമായ സമരം കാരണം നിരവധി തവണ പാറപൊട്ടിക്കുന്നതിന് അധികാരികൾ വിലക്കേർപ്പെടുത്തിയിരുന്നു. കോറിയുടെ ഒരു കിലോമീറ്ററിനുള്ളിൽ സംരക്ഷിത വനമേഖല ഉണ്ടെങ്കിൽ മലതുരന്ന് പാറപൊട്ടിക്കരുതെന്ന സുപ്രീം കോടതിയുടെ ഉത്തരവ് കാറ്റിൽ പറത്തിയാണ് കോറി പ്രവർത്തിക്കുന്നതെന്നാണ് സമരക്കാരുടെ ഭാഷ്യം.

മാത്രവുമല്ല കോറി പ്രവർത്തിക്കുന്ന മലയുടെ ഏതാനും അകലെ സ്ഥിതിചെയ്യുന്ന മറ്റൊരു മലയാണ് വയനാട്ടിലെ ബാണാസുറ സാഗർ ഡാമിന്റെ റിസർവെയറെന്നാണ് ഇവർ പ്രധാനമായും ചൂണ്ടിക്കാണിക്കുന്ന മറ്റൊരു വാദം, ഇത് വലിയ രീതിയിലുള്ള അപകടം അതിവിദൂരമല്ലാത്ത ഭാവിയിൽ വിളിച്ചുവരുത്തുമെന്നും സമരക്കാർ ഉന്നയിക്കുന്നു. 

മഴക്കാലമായാൽ പശുക്കടവെന്ന മലയോര ഗ്രാമത്തിന്റെ സൗന്ദര്യം വിവരണാധീതമാണ്. നിറഞ്ഞുകവിഞ്ഞൊഴുകുന്ന അരുവിയും പുഴയും വെള്ളച്ചാട്ടവും പച്ചവിരിച്ച മലയോര പാതകളും ആ കൊച്ചു ഗ്രാമത്തിന്റെ തനിനാടൻ ഭംഗി തെല്ലും ചോരാതെ നിലനിർത്തുന്നു. 

pashukkadav kuttiady, rk nadapuram, kakkayam dam, vattippana mala pashukkavu, maruthongara panchayath, kavilumpara panchayath, rayees koodatt

കുറ്റ്യാടിയിൽ നിന്ന് 10 കിലോമീറ്റർ അകലെ വന്യ ജീവികൾ സ്വൈര്യ വിഹാരം നടത്തുന്ന കൊടുംകാട് | Kuttiady Forest | Janakikkadu Eco-Tourism

 

വയനാട് മലനിരകളോട് ചേർന്ന് കിടക്കുന്ന നിരവധി മലയോര ഗ്രാമങ്ങളുണ്ട് കുറ്റ്യാടിയിൽ. കുറ്റ്യാടി ചുരത്തിന്റെ ഇരുവശങ്ങളിലുമുള്ള മലനിരകളിലെ പ്രകൃതി ഭംഗിയിൽ ഒളിഞ്ഞിരിക്കുന്ന ഗ്രാമങ്ങളിൽ ചെന്ന് മനസ്സിനെ കുളിരണിയിക്കുന്ന കാഴ്ചകൾ കണാം. 

കുറ്റ്യാടി ടൗണിൽ നിന്നും മരുതോങ്കര-പെരുവണ്ണാമുഴി റോഡിൽ 10 കിലോമീറ്റർ സഞ്ചരിച്ചാൽ മലബാർ വന്യജീവി സങ്കേതത്തിലൂടെ കന്നുപോവുന്ന കാനനപാതയിലൂടെ ആനയേയും കാട്ടുപോത്തിനേയും കണ്ട് ഒരു അടിപൊളി യാത്രപോവാം. കാട് കഴിഞ്ഞ് നേരെ ചെന്നെത്തുന്നത് പെരുവണ്ണാമുഴി ഡാമിലേക്കാണ്.

കാനന ഭംഗിയുടെ നാട് കൂടിയാണ് കുറ്റ്യാടി. കൊട്ടിയൂർ റിസർവ്ട് വനത്തോട് ചേർന്ന് നിൽക്കുന്ന മലബാർ വന്യജീവി സങ്കേതം കോഴിക്കോടിന്റെ മലയോര കാഴ്ചകളെ വേറിട്ടതാക്കുന്നു. പക്രംതളത്തിൽ നിന്ന് ആരംഭിച്ച് താമരശ്ശേരി ചുരംവരെ നീണ്ടുകിടക്കുന്നുണ്ട്  കോഴിക്കോട്ടെ വനത്തിനോട് ചേർന്ന പ്രധാന മലയോര ഗ്രാമങ്ങൾ.

ചെമ്പനോടയിൽ നിന്ന് വയനാട്ടിലെ പടിഞ്ഞാറ തറയിലേക്ക് ഒരു പ്രൊപോസിഡ് സംസ്ഥാന പാതയുണ്ട്. പണ്ടെങ്ങൊ ആരംഭിച്ച് അപ്പോൾ തന്നെ പദ്ധതി അവസാനിപ്പിച്ചൊരു സംസ്ഥാന പാത. ഈ പാതയിലൂടെ കുറേ അങ്ങ് ചെല്ലുമ്പോൾ മലമുകളിൽ ഒരു അത്ഭുത ഗ്രാമം നമ്മെ കാത്തിരിപ്പുണ്ട്. പൂഴിത്തോട് എന്ന ഈ മലയോര ഗ്രാത്തിൽ നിന്നാണ് കുറ്റ്യാടി പുഴയുടേയും കടന്തറ പുഴയുടേയും പ്രധാന ഉൽഭവ കേന്ദ്രം. പൂഴിത്തോട് കോഴിക്കോട് ജില്ലയിലെ റോഡ് അവസാനിക്കുന്ന ഗ്രാമങ്ങളിലൊന്നാണ്. കൊടും കാടിനടുത്ത് വച്ച് റോഡ് അവസാനിക്കുന്നു. കാടിന് അക്കരെ വയനാട് ആണ്, ചെന്ന് കയറുന്നതൊ പ്രസിദ്ധമായ കളിമണ്ണിൽ തീർത്ത ബാണാസുറ സാഗർ ഡാമിലേക്ക്. 

ചെമ്പനോടയിലെ തന്നെ മറ്റൊരു മലയോര ഗ്രാമമാണ് ആലമ്പാറ. വർഷാവർഷം ഇന്നാട്ടിൽ പുലി ഇറങ്ങുന്നതിനാൽ പുലി ഊര് എന്നും ഈ നാടിനെ ചിലർ വിളിക്കാറുണ്ട്. വനപാലകർ നിരവധി തവണ കൂട് വച്ച് പുലിയെ പിടിക്കാൻ ശ്രമിച്ചെങ്കിലും ഇതുവരെയും പിടിക്കാറായിട്ടില്ല.

കാനന ഭംഗിയും, വെള്ളച്ചാട്ടവും, നിരവധി പുഴയുടെ ഉൽഭവ കേന്ദ്രവും, പെരുവണ്ണാമുഴി ഡാമും തുടങ്ങി ഒരു യാത്രികന് വേണ്ടതെല്ലാം ഒരുക്കിവച്ച് കാത്തിരിക്കുകയാണ് കുറ്റ്യാടി മലയോരകാഴ്ചകൾ.

kuttiady forest | Pashukkadav kuttiady | Janakikkadu eco tourism kuttiady | Peruvannamuzhi dam | maruthonkara panchayath | Kavilumpara panchayath | rk nadapuram | rayees koodatt 

"കടലുണ്ടി ലോക ടൂറിസം ഭൂപടത്തിൽ ഇടം പിടിക്കും" കടലുണ്ടിക്കാർക്ക് നിങ്ങളിൽ തികഞ്ഞ പ്രതീക്ഷയുണ്ട് | Kadalundi Tourism | Responsible Tourism in Kerala

പാലക്കാട് ജില്ലയിലെ സൈലന്റ് വാലിയിൽ നിന്ന് ഉൽഭവിച്ച് മലപ്പുറത്തുകാരോട് കഥകൾ പറഞ്ഞ് അറബിക്കടലിൽ പതിക്കുന്ന കടലുണ്ടി പുഴയ്ക്കും വയനാട്ടിലെ എളിമ്പിലേരി മലനിരകളിൽ നിന്ന് ഉൽഭവിച്ച് കോഴിക്കോട്ടുകാരുടേയും മലപ്പുറത്തുകാരുടേയും കിസ്സകൾ കേട്ട് അറബിക്കടലിൽ ചെന്നിറങ്ങുന്ന ചാലിയാറിന്റേയും ഇടയിൽ കടലുണ്ടി എന്ന ചെറിയൊരു ഗ്രാമമുണ്ട്. പ്രകൃതി ഭംഗിയുടെ മടിത്തട്ട് എന്ന് വിശേഷിപ്പിച്ചാൽ അത്  അതികമാവില്ല. 

ജില്ലാ ടുറിസം വകുപ്പ് നടപ്പാക്കുന്ന ഉത്തരവാദിത്യ ടൂറിസം (Responsible Tourism Dept Kozhikode) പദ്ധതിയുടെ ആദ്യഘട്ട പഠനം എന്ന ഉത്തരവാദിത്യത്തോടെയാണ് ഞങ്ങൾ കടലുണ്ടിയിലെത്തുന്നത്. തിരുവനന്തപുരം മുതൽ കണ്ണൂർ വരെ ഉള്ള എല്ലാ ജില്ലകളിൽ നിന്നും ക്യാംപിൽ പ്രതിനിധികളുണ്ട്. മിക്കവരും എം.എസ്.ഡബ്ലൂ (MSW) വിഭാഗത്തിൽ പഠനം നടത്തുന്നവരാണ്. 

പ്രധാനമായും അഞ്ച് തരം പദ്ധതികളാണ് കടലുണ്ടിയിൽ നടപ്പിലാക്കാൻ ടൂറിസം വകുപ്പ് ഉദ്ദേശിക്കുന്നത്. പദ്ധതികളെ കുറിച്ച് വിശദീകരിക്കാൻ പ്രിയ സുഹൃത്തും ജില്ലാ ടൂറിസം വകുപ്പ് കോർഡിനേറ്ററുമായ ശ്രീകലാ ലക്ഷ്മി നേരത്തെ തന്നെ എത്തിച്ചേർന്നു. 'STREET' (sustainable, tangible, responsible, experiential, ethnical, tourism hub) എന്നതാണ് പദ്ധതിയുടെ പേര്. 

Food Street, Art Street, Green Street, Water Street, Village Experience Street ഇങ്ങനെ പേര് നൽകിയ അഞ്ച് പദ്ധതികൾ അടിസ്ഥാനമാക്കിയാണ് ക്യാംപിന്റെ പ്രവർത്തനങ്ങൾ. ആറ് പേരടങ്ങിയ ടീമിനെ സഞ്ചമാക്കി വേണ്ട നിർദേശങ്ങൾ നൽകി ഒാരോ സ്ട്രീറ്റിനും നേരത്തെ തീരുമാനിച്ചത് പോലെ അനുയോജ്യമായ സ്ഥലങ്ങളിലോട്ട് ഞങ്ങൾ പോവുകയും അവിടെ നടപ്പാക്കാൻ പോവുന്ന പദ്ധതിക്ക് ആവശ്യമായ വിവരങ്ങൾ ശേഖരിക്കുകയും തുടർന്ന് ഞങ്ങളുടെ കണ്ടത്തലുകൾക്ക് ആവശ്യമായ മാറ്റങ്ങൾ വരുത്തി പഞ്ചായത്തിനും ജില്ലാ ടൂറിസം വകുപ്പ് ഉദ്യോഗസ്ഥർക്കും മുമ്പിൽ അവതരിപ്പിക്കുകയും ചെയ്തു. 

പാതിരാവ് വരെ പാട്ടുപാടിയും കഥപറഞ്ഞും കളിയും തമാശയുമൊക്കെയായി നല്ല കുറച്ച് ദിനരാത്രങ്ങൾ സമ്മാനിച്ച ജില്ലാ ടൂറിസം വകുപ്പിനും, ഇത്രമനോഹരമായൊരു ക്യാംപ് സംഘടിപ്പിച്ച 'Captains' എന്ന കൂട്ടായ്മയ്ക്കും ഹൃദയത്തിൽ തൊട്ട നന്ദി ഉണ്ട്. നായകൻ അഫ്സൽക്ക, ജാസിം, ഫസ്ന, ആദർശ്, Solo ജിന്ന്, നിങ്ങളുടെ Dedication അടിപൊളിയാണ് Broz. 

എവിടുന്നൊക്കെയോ വന്ന് 3ദിവസം ഒപ്പമിരുന്ന് ഭക്ഷണം കഴിച്ചും ഒപ്പമിരുന്ന് ആടിയും പാടിയും ഹൃദയം കവർന്നവരെ നിങ്ങളെന്നും ഒാർമയിൽ ഉണ്ടാവും നമ്മളിനിയും കണ്ടുമുട്ടും കഥകൾ പറയും കടലുണ്ടിയെന്ന മനോഹര ഗ്രാമത്തെ നാളെ ലോകം അറിയുമ്പോൾ കടലുണ്ടിയിലെ ഒാരോ മണൽത്തരികളും നമ്മെ ഒാർക്കും...

The Rajiv Gandhi National Institute of Youth Development (RGNIYD) | jdt college kozhikode | labour india college marangattupilly | st aloysius college mangalore | MSW Courses in kerala | msw courses in calicut | RK Nadapuram | Rayees Koodatt

തെങ്ങ് കയറാനും കൃഷിപ്പണിക്കുമായി മലയാളികൾ പോവുന്ന അറബ് നാട് | Salalah Oman

 

തെങ്ങ് കയറാനും കവുങ്ങിൽ കയറാനും മറ്റ് കൃഷി ആവശ്യങ്ങൾക്കുമായി കടൽ കടന്നുപോവുന്നവരെ കുറിച്ച് കേട്ടിട്ടുണ്ടൊ? എന്നാൽ അങ്ങനെയൊരു നാടുണ്ട് അറേബ്യയിൽ. കേരളവുമായി വാണിജ്യപരമായും ഭൂമിശാസ്ത്രപരമായും ഏറെ സാദൃശ്യമുള്ളൊരു അറബ് നാട്. 

കേരളത്തിലുള്ളത് പോലെ നാണ്യവിളകളും ധാന്യവിളകളും ധാരാളമായി വിളവെടുക്കുന്ന ലോകത്തിലെ മറ്റൊരു കേരളമെന്നും അറേബ്യയിലെ പൂന്തോട്ടമെന്നും അറിയപ്പെടുന്ന സുന്ദരമായൊരു നാടാണ് സലാല. കണ്ണെത്താ ദൂരത്തോട്ട് പരന്നു കിടക്കുന്ന തെങ്ങിൻ തോപ്പുകൾ, ഇടതൂർന്ന് നിൽക്കുന്ന വാഴത്തോട്ടങ്ങൾ, തിങ്ങിനിറഞ്ഞ കവുങ്ങിൻ തോപ്പുകൾ പച്ചപടർന്ന വെറ്റില വള്ളികളും കപ്പയും, ചക്കയും, മാങ്ങയും, മാതളവും പച്ചക്കറികളും എല്ലാം വിളയുന്ന നാടാണ് സലാല. തോട്ടങ്ങൾ പാട്ടത്തിനെടുക്കുന്നവും കൃഷിചെയ്യുന്നവരും കൂടുതൽ മലയാളികൾ തന്നെ. കൃഷിക്കനുയോജ്യമായ കാലാവസ്ഥയും തെളിനീരൊഴുകുന്ന അരുവികളും ഫലഭൂഷ്ടമായ മണ്ണുമാണ് ഇതിൽ പ്രധാനപ്പെട്ടത്. 

രണ്ടായിരമാണ്ട് പഴക്കമുള്ള ഇന്ത്യയും അറബ്നാടും തമ്മിലുണ്ടായിരുന്ന കച്ചവട, സംസ്കാര വിനിമയത്തിലും കണ്ണികളായി വർത്തിച്ചത് കേരളവും സലാലയുമായിരുന്നു.  അന്നത്തെ യമനിന്റെ ഭാഗമായിരുന്ന ഇന്നത്തെ സലാല ഉൾക്കൊള്ളുന്ന ദോഫാർ മേഖലയിൽ നിന്ന് കൊടുങ്ങല്ലൂർ, കൊല്ലം, കൊച്ചി തീരദേശങ്ങളിൽ പായ്ക്കപ്പലുകൾ നങ്കൂരമിട്ടു. അന്നത്തെ ദോഫാറിന്റെ വരുമാനമായിരുന്ന കുന്തിരിക്കവും മറ്റു അറേബ്യൻ വിഭവങ്ങളും നമ്മുടെ കറുത്ത പൊന്നിനും മറ്റു സുഗന്ധദ്രവ്യങ്ങൾക്ക് പകരമായി നൽകി, അതിന് പുറമേ ഇരു കരകളും തമ്മിൽ ഇണപിരിയാത്ത ബന്ധവും കോർത്തുവച്ചു.

കേരത്തിലും മറ്റും കാലവർഷം തെറ്റാറുണ്ടെങ്കിലും കൃത്യമായി വർഷത്തിൽ രണ്ടുമാസം മഴ ലഭിക്കുന്നുണ്ട് സലാലയിൽ. ജുലൈ പകുതി മുതൽ സെപ്തംബർ പകുതി വരെയാണ് കരീഫ് എന്ന പേരിലറിയപ്പെടുന്ന മഴക്കാലം. കരീഫ് സീസണാണ് സലാലയുടെ ഉൽസവ കാലം, വിദേശ രാജ്യങ്ങളിൽ നിന്ന് പ്രത്യേകിച്ച് അറബ് രാജ്യങ്ങളിൽ നിന്ന് ലക്ഷങ്ങളാണ് സലാലയിലേക്ക് ഒഴുകുക. ഈ കാലയളവിൽ സലാലയുടെ വിവിധ ഭാഗങ്ങളിൽ ഫെസ്റ്റുവലുകളും മറ്റു ആഘോഷ പരിപാടികളും നടക്കുന്നു.

salalah oman | rk nadapuram

പൂക്കളുടെ നഗരത്തിലെ അലാഹുദ്ദീൻ ഹസൻ ബഹ്മാൻ ഷായുടെ സാമ്രാജ്യം | Gulbarga Fort Karnataka

 

ഡൽഹി സുൽത്താന്മാരുമായുള്ള കൂട്ടുഭരണം ഉപേക്ഷിച്ചതിന് ശേഷമാണ് അലാഹുദ്ദീൻ ഹസൻ ബഹ്മാൻ ഷാ ഗുൽബർഗ കേന്ദ്രമാക്കി അദ്ദേഹത്തിന്റെ സാമ്രാജ്യം കെട്ടിപ്പടുക്കുന്നത്. ഹൈദരാബാദിൽ നിന്ന് 200ഉം ബാംഗ്ലൂരിൽ നിന്ന് 623 കിലോ മീറ്ററും അകലെയായി സ്ഥിതിചെയ്യുന്ന ഒരു കൊച്ചു നഗരമാണ് ഗുൽബർഗ കൽബുർഗി.

ഗുൽബർഗ കോട്ട

യൂറോപ്യൻ മിലിട്ടറി നിർമാണ ശൈലിയിൽ ബഹ്മാൻ ഷാ നിർമിച്ച ഭരണസിരാ കേന്ദ്രമായിരുന്നു ഗുൽബർഗ ഫോർട്ട്. മൂന്ന് കിലോമീറ്റർ ചുറ്റളവിൽ നീണ്ടുപരന്നു കിടക്കുന്ന ഈ കോട്ട അക്ഷരാർത്ഥത്തിൽ ഒരു അത്ഭുതം തന്നെയാണ്. ഇരുവത്തി ആറോളം പടുകൂറ്റൻ പീരങ്കികൾ അതും ലോകത്തിലെ തന്നെ ഏറ്റവും വലിയ പീരങ്കി ഉള്ളതും ഈ കോട്ടയിലാണ്. കോട്ടയുടെ മറ്റൊരു പ്രധാനപ്പെട്ട പ്രത്യേകത ഇതിനുള്ളിലെ Jamia Masjid ആണ് (പള്ളിയെ കുറിച്ച് മറ്റൊരു പോസ്റ്റിൽ പറയാം). ഇരുന്നൂറിൽപരം കുടുംബങ്ങൾ ഇന്നും ഈ കോട്ടക്കുള്ളിൽ താമസിച്ചുവരുന്നു. ചരിത്ര യാത്രകൾ നടത്തുന്നവർ തീർച്ചയായും കണ്ടിരിക്കേണ്ട ഒരു സ്ഥലമാണിവിടം. ഗുൽബർഗ റയിൽവേ സ്റ്റേഷനിൽ നിന്ന് 4 കിലോമീറ്റർ സഞ്ചരിച്ചാൽ ഇവിടെയെത്താം.

ഇനിഅൽപം ഗുൽബർഗയെക്കുറിച്ച്

ഗുൽബർഗ എന്നാൽ പൂക്കളുടെ നഗരം എന്ന് അർത്ഥം വരുന്ന ഒരു ഉർദു വാക്കാണ്. കൽബുർഗി എന്നാൽ കല്ലുകളുടെ കോട്ട എന്ന കന്നട വാക്കിൽ നിന്നുമാണ് ഈ നഗരത്തിന് ഈ പേരുകൾ ലഭിച്ചത്. 1347ലാണ് ബഹ്മാൻ ഷാ അദ്ദേഹത്തിന്റെ സാമ്രാജ്യത്തിന് തുടക്കം കുറിക്കുന്നത്, ഗുൽബർഗ കേന്ദ്രമാക്കിയായിരുന്നു ഷായുടെ ഭരണം. 1428ൽ അദ്ദേഹത്തിന്റെ ഭരണം അവസാനിക്കുമ്പോൾ അദ്ദേഹത്തിന്റെ സാമ്രാജ്യം Bijapur, Bidar, Berar, Ahmednager, and Golconda എന്നിങ്ങനെ അഞ്ച് സ്വതന്ത്രഭരണ പ്രദേശങ്ങളായി മാറിയിരുന്നു. ഗുൽബർഗ ബിജാപൂരിന്റെ അധീനതയിലും പിന്നീട് പതിനേഴാം നൂറ്റാണ്ടിൽ ഔറംഗസീബിന്റെ ഭരണകാലത്ത് ഗുൽബർഗ ഗോൽക്കൊണ്ട സാമ്രാജ്യത്തിന്റെ കീഴിലുമായിരുന്നു.

ഔറംഗസീന്റെ പിൻതുടർച്ചയായി വന്ന അഫ്സൽ ഷായുടെ മുഗൾ ഭരണം ഹൈദരാബാദ് സംസ്ഥാനം രൂപീകരിക്കുകയും ഗുൽബർഗ അതിന്റെ ഭാഗമാവുകയും ചെയ്തു. പിന്നീട് സ്വതന്ത്ര്യ ലബ്ദിക്കു ശേഷം ഹൈദരാബാദ് ഇന്ത്യൻ യൂനിയനോട് കൂട്ടിച്ചേർക്കുകയും ഗുൽബർഗ ഉൾപ്പെടുന്ന ഭാഗങ്ങൾ 1956ൽ മൈസൂരിന്റെ ഭാഗമാവുകയും ചെയ്തു.

gulbarga fort | gulbarga masjid | kalaburagi | rk nadapuram

RK Nadapuram