വരയൻ പുലിയെ ഫ്യൂരിടാൻ വച്ച് കൊന്ന പളംപുത്തൂർ ഗ്രാമം | Palamputhur Village Kodaikanal | RK Nadapuram

മനുഷ്യർക്കിടയിൽ അറുത്ത് മാറ്റാൻ പറ്റാതെ ജാതിയത ഇന്നും ജീവിക്കുന്നു, ഇതര ജാതിക്കാരന്റെ ഉത്സവങ്ങൾക്കും എന്തിനേറെ കല്യാണം പോലും കൂടാതെ മാറി നിൽക്കുന്ന സംഭങ്ങൾ ഈ ആധുനിക യുഗത്തിലും... പറഞ്ഞു വരുന്നത് പളംപുത്തൂർ എന്ന സ്വർഗ്ഗ ഗ്രാമത്തെ കുറിച്ചാണ്. പ്രകൃതി ഭംഗി കൊണ്ട് ആകാശം കീഴടക്കുന്ന ഊരുകളാണ് എന്നും കൊടൈക്കനാലിന്റെ സൗന്ദര്യം. എന്നാൽ ഇങ്ങനെ ചില പ്രാകൃത സംഭവങ്ങൾ ഇന്നും നടന്നു പോരുന്നു. 

പളംപുത്തൂരിന്റെ ജിന്ന് അൻസാറിൽ നിന്നാണ് ഈ ഊരിനെ കുറിച്ച് അറിയുന്നത്, അവർക്കവിടെ Stay Moksh എന്നൊരു റിസോർട്ട് ഉണ്ട്, കോഴിക്കോട് നിന്ന് പളനിയിലേക്ക് രാത്രി 8.30 ന് ഉള്ള KSRTC SWIFT ബസ്സിൽ ടിക്കറ്റ് ബുക്ക്‌ ചെയ്ത് യാത്ര ആരംഭിച്ചു. പുലർച്ചെ 3.30 ന് പളനി ബസ് സ്റ്റാൻഡിൽ, അവിടുന്ന് ഇനി 4.30ന് ആണ് കൊടൈക്കനാലിലേക്കുള്ള ബസ്, ദീപാലൻകൃതമായ പളനി മലയുടെ അരികിലുടെ ബസ് ചുരം കയറാൻ തുടങ്ങി, ഏകദേശം 8000ത്തിൽ പരം അടി ഉയരത്തിൽ അണ്ണാമലയ് റിസേർവ്ഡ് ഫോറെസ്റ്റ് വരെ പരന്നു കിടക്കുന്ന ഒരു ഭീമൻ മുടി, മല കയറി ചെന്നെത്തുന്നത് സഞ്ചാരിരികളുടെ ഇഷ്ട താവളമായ കൊടൈക്കനാലിൽ. വല്ലാത്തൊരു ഭംഗിയാണ് ഈ ഫോറെസ്റ്റിലൂടെള്ള ബസ് യാത്രയ്ക്ക്.  

അതിരാവിലെ തന്നെ കൊടൈക്കനാലിൽ എത്തി, മഞ്ഞു മൂടിയ ആ തണുത്ത പ്രഭാതം ആസ്വദിക്കുക അത്ര തന്നെ, കുറച്ച് സമയം ആ ബസ് സ്റ്റാൻഡിന്റെ മൂലയിൽ അങ്ങനെ ഇരുന്നു, പളംപുത്തൂരിലേക്കുള്ള ആദ്യ ബസ് 8.30 ആണ്, ഒരു ദിവസം 3 ബസ് സർവീസ് ആണ് ഈ ഗ്രാമത്തിലേക്ക് ഉള്ളത്. 

ഏകദേശം 50 KM യാത്രയുണ്ട് പളംപുത്തൂരിലേക്ക്, ഇതിൽ ഭൂരിഭാഗവും ഫോറസ്റ്റിലൂടെയാണ് യാത്ര. ഒരു വാഹനത്തിന് കഷ്ടിച്ച് പോകാൻ മാത്രം വീതിയുള്ള റോഡിലൂടെ തമിഴ്നാട് സർക്കാരിന്റെ പച്ച നിറത്തിലുള്ള ബസ് ചീറി പായുകയാണ്. ചെറിയ ഹെയർപിൻ വളവുകൾ, ഇടയ്ക്കിടെ വരുന്ന ഒറ്റപ്പെട്ട ഗ്രാമങ്ങൾ, കോഡ മഞ്ഞു മൂടിയ ഗ്രാമങ്ങൾ അതിനിടയിൽ പലജാതി കൃഷിയിടങ്ങൾ, പണി ആയുധങ്ങളുമായി പോവുന്ന കൃഷിക്കാർ, കണ്ട് ശീലമില്ലാത്ത കുറേ രസകരമായ കാഴ്ചകൾ 🌳 

കൊടൈക്കനാലിനും പളംപുത്തൂരിനും ഇടയിൽ പൂമ്പാറ എന്നൊരു കൊച്ചു നഗരം ഉണ്ട്, നഗരം എന്ന് അതിനെ വിളിക്കുന്നത് ഒരു പക്ഷെ ശരിയാവില്ല, നല്ല തിരക്ക് പിടിച്ച ഒരു കവല ഒരുപാട് കച്ചവട സ്ഥാപനങ്ങൾ.... കുറേ പെട്ടികൾ അടുക്കി വച്ചത് പോലെ തോന്നിക്കുന്ന തരത്തിൽ ഭൂമിയെ തട്ടുകളായി തിരിച്ചു പലതരത്തിലുള്ള കൃഷികൾ നടത്തുന്നു, ഇത് തന്നെയാണ് ആ കൊച്ചു നഗരത്തിന്റെ ഭംഗിയും. യാത്രക്കിടയിലെ പ്രഭാതഭക്ഷണം ഇവിടെ വച്ചാണ്... dream breakfast ❤️

കോഡമഞ്ഞിലേക്ക് തുളച്ചു കയറി ബസ് മുന്നോട്ട് കുതിക്കുകയാണ്, താറിട്ട റോഡുകൾ എപ്പോയോ അവസാനിച്ചിരിക്കുന്നു, കല്ല് പാകിയ റോഡുകൾ, അത് കഴിഞ്ഞു ചെളി നിറഞ്ഞ മൺപാതകൾ... പടച്ചോനേ ഈ യാത്രയ്ക്ക്‌ ഒരു അറ്റം ഇല്ലേ, എങ്ങും മഞ്ഞു മൂടിയ മല നിരകൾ മാത്രം, അതിനിടയിൽ അങ്ങിങ്ങായ് കുറേ കുടിലുകൾ, കാടിനോട് കഥ പറഞ്ഞു തടാകത്തിന് അരികിലായ് വല്ലാത്തൊരു മൊഞ്ചിൽ കോഡ മഞ്ഞു അണിഞ്ഞു നിൽക്കുന്ന സഞ്ചാരികളുടെ സ്വന്തം kookal village കാണാം🌳🐅... 

അൻസാറിന്റെ വിളി വന്നു 3KM കഴിഞ്ഞാൽ കർഷകർ ക്യാരറ്റ് കഴുകുന്ന പുഴക്ക്‌ കുറുകെ ഒരു പാലം ഉണ്ട് അവിടെ ഇറങ്ങണം... പളംപുത്തൂർ എന്ന സ്വർഗ്ഗ ഗ്രാമത്തിന്റെ ഉച്ചിയിൽ 24 മണിക്കൂറും കോഡ മഞ്ഞു മൂടിയ ഒരു സ്വപ്ന കൂടാരമാണ് Stay Moksh 🌳 പളംപുത്തൂരിന്റെ എല്ലാ സൗന്ദര്യവും ഒരൊറ്റ ഫ്രെമിൽ കാണാൻ പറ്റുന്ന രീതിയിൽ ഒരു മലഞ്ചെരുവിൽ Tent Stay, Rooms, camp fire, view point.... ❤️❤️❤️🌳 ഇവിടെയാണ് എന്റെ താമസം.... ഇവിടെ electrecity ഇല്ല എന്നതാണ് ഏറ്റവും വലിയ ഹൈലൈറ്റ്, സോളാർ ആണ് അടുത്ത ഓപ്ഷൻ, 24 മണിക്കൂറും മഞ്ഞു മൂടിയ കാലാവസ്ഥ ആയതിനാൽ അതും മിക്ക സമയങ്ങളിലും ഓഫ് ആയിരിക്കും. 

ഈ ഭാഗത്തെ അവസാന ഊര് ആണ് പളംപുത്തൂർ, ഒറ്റ നോട്ടത്തിൽ മലകൾക്ക് മുകളിൽ നിൽക്കുന്ന ഒരു ഗ്രാമം, ഇവിടെ നിന്ന് എങ്ങോട്ട് നോക്കിയാലും മലഞ്ചെരുവുകളാണ്, മല ഇറങ്ങി പോവുംതോറും പുലിയും കടുവയും അതിവസിക്കുന്ന തിങ്ങി നിറഞ്ഞ കാടും, അതിനിടയിൽ എണ്ണിയാൽ ഒതുങ്ങാത്തത്ര വെള്ളചാട്ടങ്ങൾ.... 

ഈ നാടിന് ഒരു വലിയ കഥ ഉണ്ട് പറയാൻ, വർഷങ്ങൾക്ക് മുമ്പ് കാടിറങ്ങി പളംപുത്തൂർ ഗ്രാമത്തിൽ വന്ന് പശുവിനെ ആക്രമിച്ച വരയൻ പുലി എന്ന് ഊരിലുള്ളവർ വിളിക്കുന്ന കടുവയെ🐅 ഫ്യൂരിടാൻ വച്ച് കൊന്നു കളഞ്ഞ വല്ലാത്തൊരു കഥ 🫠 കടുവ ഒരു തവണ വന്ന് പശുവിന്റെ കാൽ കടിച്ചു പോയത്രേ, കടുവ വീണ്ടും വരും എന്ന വിശ്വാസത്തിൽ പശുവിന്റെ ശരീരത്തിൽ ഫ്യൂരിടാൻ വച്ചു, പിറ്റേ ദിവസം വിചാരിച്ചത് പോലെ തന്നെ 🐅കടുവ വന്നു പശുവിനെ കടിച്ചു തിന്നു, അടുത്ത ദിവസം ഒരു അരുവിക്ക് അരികിൽ കടുവയുടെ ജഡം കണ്ടെത്തി.... 

ഈ കഥ മല കയറുന്നതിന് ഇടയിൽ അൻസാർ പറഞ്ഞിരുന്നെങ്കിലും തിരിച്ചു വരുന്ന വഴി ബസ്സിൽ വച്ച് ഊരിലെ ഒരു അങ്കണവാടി ടീച്ചർ കൂടെ പറഞ്ഞപ്പോൾ ആണ് അത് ആധികാരികമായത്. കഴിഞ്ഞ കുറച്ച് വർഷമായി ആ കർഷകൻ ജയിൽ വാസം അനുഭവിച്ചു വരുന്നു.

തിരക്ക് പിടിച്ച ജീവിത സാഹചര്യത്തിൽ നിന്ന് നല്ല ഗ്രാമ കാഴ്ചകൾ കണ്ട് ശരീരം കോച്ചുന്ന കോഡമഞ്ഞും കൊണ്ട് മല കയറ്റവും കുക്കിങ്ങും ഒക്കെയായി ഒരു വല്ലാത്ത നിമിഷങ്ങൾ ആസ്വദിക്കണോ കേറി പൊയ്ക്കോ മക്കളെ പളംപുത്തൂരിലേക്ക് 🌳🐅

 Youtube RK Nadapuram my facebook

ഗോപാൽസ്വാമി ഹിൽസ്- ബന്ദീപൂർ കടുവാ സങ്കേതത്തിനരികിലെ പൂക്കളുടെ താഴ്വര | Gopalaswamy Hills | Bandipur

 

ഗുണ്ടൽപേട്ട എന്ന് കേൾക്കാത്ത മലയാളികൾ ഉണ്ടാവില്ല, കാര്യം മറ്റൊന്നുമല്ല നാം നിത്യജീവിതത്തിൽ ഉപയോഗിക്കുന്ന പച്ചക്കറികളിൽ അധികവും കർണാടകത്തിലെ ചാമരാജനഗർ ജില്ലയിലെ ഗുണ്ടൽപേട്ട എന്ന ഗ്രാമത്തിൽ നിന്നുള്ളവയാണ്.

വയനാട്ടിലെ മുത്തങ്ങ ബോർഡറും കടന്ന് ഏകദേശം 30 കിലോമീറ്റർ ബന്ദീപൂർ കടുവാ സങ്കേതത്തിലൂടെ സഞ്ചരിച്ചാൽ ഗുണ്ടൽപേട്ടയിലെത്താം. തക്കാളിയും, ഉള്ളിയും, കേബേജും, പയറും, ബീറ്റ്റൂട്ടും, പച്ചമുളകും തുടങ്ങിയ പച്ചക്കറികൾ കിലോമീറ്ററുകളോളം വിളവെടുപ്പിനായി തയ്യാറായി നിൽക്കുന്നത് കാണാം. കേരളക്കാർ പച്ചക്കറി കഴിക്കണമെങ്കിൽ ഗുണ്ടൽപേട്ടക്കാർ പാടത്തിറങ്ങണമെന്ന് സാരം.

പച്ചക്കറി പോലെ തന്നെ അവരുടെ മറ്റൊരു പ്രധാന കൃഷിയാണ് പൂക്കൾ. നമുക്ക് ഒാണക്കാലമാവുന്നതിന് അടുപ്പിച്ച് പച്ചക്കറി തോട്ടങ്ങളിൽ അവർ ചെണ്ടുമല്ലിയുടെയും സൂര്യകാന്തിയുടെയും വിത്തിറക്കും. മൂന്ന് മാസം കൊണ്ട് കിലോമീറ്ററുകളോളം പൂക്കളുടെ താഴ്വരയാവുന്ന ഇന്ത്യയിലെ അപൂർവം ചില കാഴ്ചകളിൽ ഗുണ്ടൽപേട്ട് ഗോപാൽസ്വാമി ഹിൽസ് പ്രദേശങ്ങൾ ഇടം പിടിക്കും. ഗുണ്ടൽപേട്ടയ്ക്ക് പൂക്കളുടെ നിറകുടമെന്നും കടുകവകളുടെ നാടെന്നും വിളിപ്പേരുണ്ട്.

ഇന്ത്യയിലെ തന്നെ ഏറ്റവും വലിയ രണ്ടാമത്തെ കടുവാ സങ്കേതമായ ബന്ദീപൂർ റിസർവ്ട് ഫോറസ്റ്റിനോട് ചേർന്ന് നിൽക്കുന്ന നിരവധി ഗ്രാമ പ്രദേശങ്ങൾ ഉണ്ട് ഗുണ്ടൽപേട്ടയിൽ. വന്യമൃഗങ്ങളുടെ ശല്യം അതിരൂക്ഷമാണ് ഈ പ്രദേശങ്ങൾ. കാടിറങ്ങി വരുന്ന വന്യമൃഗങ്ങൾക്കിടയിൽ എങ്ങനെയാണ് നിർഭയരായി ഗ്രാമത്തിലുള്ളവർ ജീവിക്കുന്നതെന്ന് ഈ പ്രദേശങ്ങളിലൂടെ യാത്ര ചെയ്യുമ്പോൾ ചിന്തിച്ച് പോവും.

gopalswami hills | gundelupet | bandipur tiger reserved forest | karnataka | rk nadapuram | rayees koodatt

പുഴയും വെള്ളച്ചാട്ടവും കൊടും കാടും, മഴ നനഞ്ഞ് പശുക്കടവെന്ന മലയോര ഗ്രാമത്തിലേക്ക് ഒരു യാത്ര പോവാം | Pashukkadav Kuttiady

മൂന്ന് ഭാഗവും മലകളാൽ ചുറ്റപ്പെട്ട്, വന്യജീവികൾ സ്വൈരവിഹാരം നടത്തുന്ന കൊടും കാടും പുഴകളും വെള്ളച്ചാട്ടവുമൊക്കെയുള്ള കോഴിക്കോടിന്റെ വടക്ക് കിഴക്കായി പുഴകളുടെ തലോടലിൽ പച്ചപുതയ്ച്ച് കിടക്കുന്ന ഒരു ഉൾനാടൻ മലയോര ഗ്രാമമാണ് പശുക്കടവ്. 

ഇവിടെ നിന്ന് മലകൾ കയറി ചെല്ലുന്നത് മലവയൽ നാടായ വയനാട്ടിലേക്കാണ്. മഴക്കാല യാത്രയ്ക്ക് അനുയോജ്യമായ സ്ഥലമാണിവിടം, മഴ തുടങ്ങിയാൽ തോരാൻ സമയമെടുക്കുന്ന സ്ഥലങ്ങളിൽ മുൻപന്തിയിൽ നിൽക്കുന്നു പശുക്കടവ്.  പുഴയിൽ കുളിച്ചുകൊണ്ടിരിക്കെ അപ്രതീക്ഷിതമായി വന്ന മലവെള്ളത്തിൽപ്പെട്ട് 6 പേർ മരിക്കാനിടയായ സംഭവത്തോടെയാണ് പശുക്കടവ് എന്ന ചെറിയൊരു മലയോര ഗ്രാമത്തെ കേരളമറിഞ്ഞത്. കുറ്റ്യാടിയിൽ നിന്ന് വടക്ക് ഭാഗത്തേക്ക് 20 കിലോ മീറ്റർ സഞ്ചരിച്ചാൽ വയനാടിന്റെ മലഞ്ചെരുവിൽ സ്ഥിതിചെയ്യുന്ന പശുക്കടവിലെത്താം.

പ്രധാനപ്പെട്ട രണ്ട് പുഴകളുടെ ഉൽഭവ കേന്ദ്രമാണിവിടം. അതിലൊന്നാണീ ചതിയൻ പുഴ എന്നറിയപ്പെടുന്ന കടന്തറ പുഴ. വയനാടൻ കാടുകളിൽ മഴ പെയ്യുമ്പോൾ പുഴയിലെ വെള്ളം പെട്ടെന്ന് കൂടുകയും കാര്യങ്ങൾ നിയന്ത്രണാധീതമാവുകയും ചെയ്യും. അത് കാരണമാണീ പുഴയ്ക്ക് ചതിയൻ പുഴ എന്ന് പേര് ലഭിച്ചത്. പൂഴിത്തോട് പവർ ഹൗസ് സ്ഥിതി ചെയ്യുന്നതും ഇവിടെയാണ്. പശുക്കടവിൽ നിന്ന് ഏകദേശം 4കിലോമീറ്റർ സഞ്ചരിച്ചാൽ ഇവിടെയെത്താം.  

പശുക്കടവ് കുരുടന്‍ കടവ് പാലം

കുരുടൻകടവ് പുഴയാണ് പശുക്കടവിൽ നിന്ന് ഉൽഭവിക്കുന്ന മറ്റൊരു പുഴ. പുഴയുടെ ഇടത് വശത്തുള്ള കാട്ടിലൂടെ സഞ്ചരിച്ചാൽ വയനാട്ടിലെ നിരവിൽപുഴ എന്ന പ്രദേശത്ത് എത്താം. കുരുടൻ കടവ് പലം കടന്ന് ഏകദേശം 5 കിലോമീറ്റർ കുത്തനെ മലകയറിയാൽ നല്ല ഒരു വ്യൂ പോയിന്റും ഉണ്ട്. സഞ്ചാരികളെ ആകർശിക്കാനുള്ള പ്രകൃതി ഭംഗി ഉണ്ടായിട്ടും പശുക്കടവിലേക്ക് വളരെ ചുരുക്കം പേർ മാത്രമാണ് എത്തിച്ചേരുന്നത്.

പ്രസിദ്ധമായ വട്ടിപ്പനമല കോറി സ്ഥിതിചെയ്യുന്നത് പശുക്കടവിലാണ്. നാട്ടുകാരുടെ നിരന്തരമായ സമരം കാരണം നിരവധി തവണ പാറപൊട്ടിക്കുന്നതിന് അധികാരികൾ വിലക്കേർപ്പെടുത്തിയിരുന്നു. കോറിയുടെ ഒരു കിലോമീറ്ററിനുള്ളിൽ സംരക്ഷിത വനമേഖല ഉണ്ടെങ്കിൽ മലതുരന്ന് പാറപൊട്ടിക്കരുതെന്ന സുപ്രീം കോടതിയുടെ ഉത്തരവ് കാറ്റിൽ പറത്തിയാണ് കോറി പ്രവർത്തിക്കുന്നതെന്നാണ് സമരക്കാരുടെ ഭാഷ്യം.

മാത്രവുമല്ല കോറി പ്രവർത്തിക്കുന്ന മലയുടെ ഏതാനും അകലെ സ്ഥിതിചെയ്യുന്ന മറ്റൊരു മലയാണ് വയനാട്ടിലെ ബാണാസുറ സാഗർ ഡാമിന്റെ റിസർവെയറെന്നാണ് ഇവർ പ്രധാനമായും ചൂണ്ടിക്കാണിക്കുന്ന മറ്റൊരു വാദം, ഇത് വലിയ രീതിയിലുള്ള അപകടം അതിവിദൂരമല്ലാത്ത ഭാവിയിൽ വിളിച്ചുവരുത്തുമെന്നും സമരക്കാർ ഉന്നയിക്കുന്നു. 

മഴക്കാലമായാൽ പശുക്കടവെന്ന മലയോര ഗ്രാമത്തിന്റെ സൗന്ദര്യം വിവരണാധീതമാണ്. നിറഞ്ഞുകവിഞ്ഞൊഴുകുന്ന അരുവിയും പുഴയും വെള്ളച്ചാട്ടവും പച്ചവിരിച്ച മലയോര പാതകളും ആ കൊച്ചു ഗ്രാമത്തിന്റെ തനിനാടൻ ഭംഗി തെല്ലും ചോരാതെ നിലനിർത്തുന്നു. 

pashukkadav kuttiady, rk nadapuram, kakkayam dam, vattippana mala pashukkavu, maruthongara panchayath, kavilumpara panchayath, rayees koodatt